Ասպիրացիան կիստոզ ախտահարումների (կիստա, աբսցես կամ արյան կուտակում) կամ կարծր ախտահարումների (գոյացություն) ասեղով ծակումն է գործիքային հետազոտության սարքավորումների հսկողության ներքո։ Կատարվում է հեղուկի դուրս բերման կամ հյուսվածքից նմուշ վերցնելու նպատակով: Ասպիրացիայի կատարելու նպատակով կիրառվող ասեղները տարբեր տրամաչափի են և երկարության:
Հնարավորության դեպքում դադարեցվում է արյան մակարդելիությանը խոչընդոտող դեղերի ընդունումը:
Ասպիրացիայի ընթացքը ճշգրիտ կառավարելու նպատակով կիրառվում է պատկերային ուղղորդման որևէ սարքավորում ՝ ուլտրաձային հետազոտություն ՈՒՁՀ, համակարգչային շերտագրում ՀՇ, մագնիսառեզոնանսային շերտագրում ՄՌՇ, ասեղի ներմուծման ընթացքը ծրագրավորելու և հսկելու համար: Միջամտությունը կատարվում է հիվանդի պառկած կամ նստած դիրքում, իսկ պառկելու հստակ դիրքը կախված է նրանից, թե որտեղ է լինելու ասեղնածակման մուտքի հատվածը:
Սովորաբար, ասպիրացիան կատարվում է տեղային անզգայացման պայմաններում:
Միջամտությունն անցկացվում է ստերիլ և ապահով միջավայրում: Պատկերային ուղղորդման ներքո ինտերվենցիոն ռադիոլոգը ներմուծում է ասեղը ախտահարված օջախ, այնուհետև ներարկչի օգնությամբ վերցնում է նմուշ կամ հեղուկ:
Ասպիրացիան կատարվում է ինչպես ստացիոնար, այնպես էլ ամբուլատոր պայմաններում: Հնարավոր է՝ միջամտությունից հետո մի քանի ժամ ասեղնածակման շրջանում թեթև անհանգստության զգացում պահպանվի:
Ասպիրացիան կատարվում է ախտորոշիչ նպատակով (ախտահարման բնույթի մասին տեղեկություն ստանալու նպատակով) կամ բուժական նպատակով, օրինակ՝ կիստայի կամ այլ ախտաբանական հեղուկ կուտակումը վերացնելու համար: Երբեմն միայն ասպիրացիան ավելի նախընտրելի է փոքր աբսցեսների (3-4 սմ-ից փոքր) դեպքում քան դրենավորման իրականացումը՝ քանի որ դրենավորող կաթետերի կարիք այսպիսի փոքր չափի աբսցեսների դեպքում չի լինում:
Ասպիրացիա խորհուրդ չի տրվում իրականացնել եթե պացիենտն ունի արյան մակարդելիության խանգարումներ կամ բացակայում է անվտանգ պունկցիոն ուղին:
Միջամտության տեխնիկական հաջողության ցուցանիշները շատ բարձր են: Քանի որ կիրառվում են բարակ ասեղներ, միջամտությունից հետո բարդություններ շատ հազվադեպ են առաջանում: Ամենատարածված կողմնակի ազդեցություններն են կապտուկը, վարակը, իսկ թոքի ապիրացիայի դեպքում՝ պնևմաթորաքսը (օդի կուտակում թոքի և կրծքավանդակի պատի միջև ընկած տարածքում):
նյութի աղբյուրը՝ cirse.org
թարգմանությունը՝ irg.am