Բուժառուն՝ արական սեռի, 54 տարեկան
Լյարդի ցիռոզով բուժառուի մոտ սկրինինգային ՈՒՁՀ հետազոտության արդյունքում հայտնաբերվել է լյարդի S2 սեգմենտի օջախային ախտահարում։ Ցուցվել է ՀՇ քննություն։
Հաշվի առնելով բուժառուի մոտ լյարդի ցիռոզի առկայությունը, ՀՇ առանձնահատկությունները և լաբորատոր քննություններով հայտնաբերված ալֆա-ֆետոպրոտեինի (լյարդաբջջային քաղցկեղի մարկեր) բարձր մակարդակը՝ ախտորոշվեց հեպատոցելյուլար կարցինոմա( լյարդաբջջային քաղցկեղ)։
Հեպատոցելյուլար կարցինոմայի դեպքում կոնտրաստ նյութով իրականացված ՀՇ քննությամբ ուռուցքային օջախը զարկերակային փուլում լիարժեք կլանում է կոնտրաստ նյութը(հստակ վիզուալիզացվում է), իսկ երակային փուլում դատարկվում է ամբողջությամբ (չի վիզուալիզացվում)։
Բուժառուն զննվել է ուռուցքաբանի և ինտերվենցիոն ռադիոլոգի կողմից։ Հաշվի առնելով հեպատոցելյուլար կարցինոմայի բուժման ժամանակակից մոտեցումները (“BCLC-Barcelona Clinic Liver Cancer” Staging), որոշվել է կատարել լյարդի S2 սեգմենտի ախտահարման օջախի ռադիոհաճախական աբլացիա։
ՈՒՁ ուղղորդմամբ, տեղային անզգայացման տակ, ՌՀԱ էլեկտրոդներով թիրախավորվեց լյարդի S2 սեգմենտի եզակի ախտահարման օջախը, կատարվեց ռադիոհաճախական աբլացիայի 2 ապլիկացիա՝ համապատասխան սխեմայով։
Միջամտությունից ժամեր անց բուժառուն դուրս գրվեց կլինիկայից առանց գանգատներ նշելու։
2 օր անց կատարվել է ՀՇ քննություն, ըստ որի հետաբլացիոն զոնան գնահատվել է լիարժեք և ամբողջովին ընդգրկել է նախկինում առկա ախտահարման օջախը։