Բուժառուն՝ արական սեռի, 65 տարեկան
Մոտ 2 ամիս առաջ բուժառուի մոտ աջ ուսահոդի և թիակի շրջանում ի հայտ է եկել արտահայտված ցավային համախտանիշ։ Վերջինիս կապակցությամբ բուժառուն դիմել է բժշկի, կատարվել են ՀՇ և ՊԷՏ-ՀՇ քննություններ, ըստ որի հայտնաբերվել է թոքի նորագոյացություն, մակերիկամի և ոսկրերի բազմաթիվ երկրորդային օջախներ՝ առավել բնորոշ մետաստատիկ ախտահարման, այդ թվում նաև աջ թիակի ախտահարում։
Հիվանդը զննվել է ուռուցքաբանի կողմից, ախտահարման բնույթը պարզելու նպատակով ցուցվել է բիոպսիա։ Ցավային համախտանիշի կապակցությամբ նշանակվել են նարկոտիկ-անալգետիկ միջոցներ, որոնք սակայն անարդյունավետ են եղել։
Բուժառուն դիմել է Ինտերվենցիոն Ռադիոլոգիայի ծառայություն՝ բիոպսիայի նպատակով։ Ինտերվենցիոն ռադիոլոգի կողմից վերանայվել են ՀՇ պատկերները, որոշվել է իրականացնել թոքի նորագոյացությունից ասեղային տրեպանացիոն բիոպսիա։ Ինտերվենցիոն ռադիոլոգի կողմից, որպես ցավային համախտանիշի բուժման մեթոդ, առաջարկվել է իրականացնել թիակային շրջանի մետաստատիկ ախտահարման մաշկընթաց ռադիոհաճախական աբլացիա։
Իրականացվեց տրանսթորակալ ասեղային բիոպսիա թոքի նորագոյացությունից։ Միջամտությունն իրականացվեց ՀՇ ուղղորդմամբ, տեղային անզգայացման պայմաններում։
Հյուսվածաբանական պատկերը և ուռուցքային բջիջների իմունային/հակածնային կազմը՝ համադրելով հասանելի կլինիկոանամնեստիկ և ռադիոլոգիական տվյալների հետ, համապատասխանում են թոքի ինվազիվ ադենոկարցինոմային, ALK-negative, ROS1-negative, EGFR non-mutated, KRAS non-mutated, NRAS non-mutated, BRAF non-mutated:
Պլանավորվեց իրականացնել թիակային շրջանի մետաստատիկ ախտահարման ռադիոհաճախական աբլացիա։
ՈՒՁՀ ուղղորդմամբ, տեղային անզգայացման պայմաններում, կատարվեց ուռուցքի թիրախավորում, տեղադրվեց աբլացիայի էլեկտրոդը։ Իրականացվեց ռադիոհաճախական աբլացիա, տևողություն՝ 15 րոպե։
3 ժամ անց բուժառուն դուրս գրվեց կլինիկայից, գանգատվում էր թիակային շրջանում թույլ բութ ցավերից։
Կատարված միջամտությունից հետո բուժառուն դիմել է ուռուցքաբանի՝ քիմիոթերապիայի կուրսեր անցնելու նպատակով, դադարել է որևէ տեսակի ցավազրկող դեղորայքի օգտագործումից։