Բուժառու՝ 77 տարեկան, արական սեռի
Բուժառուն դիմել է Ինտերվենցիոն Ռադիոլոգիայի բաժանմունք՝ գանգատվելով աջ ստորին վերջույթի այտուցվածությունից։
Մոտ 3-4 ամիս առաջ ի հայտ է եկել այտուցվածություն աջ ստորին վերջույթի սրունք-թաթային շրջանում, որն աստիճանաբար տարածվել է դեպի վերև։ Հիվանդը դիմել է բժշկի, կատարվել է ՀՇ քննություն, ըստ որի հայտնաբերվել է հեղուկ կուտակում աջ զստագոտկային մկանի շրջանում։ Հիվանդը զննվել է վիրաբույժի կողմից, ցուցվել է հեղուկ կուտակման դրենավորում։
Հիվանդը զննվել է ինտերվենցիոն ռադիոլոգի կողմից, կատարվել է ՈՒՁՀ քննություն, ըստ որի վիզուալիզացվել է աջ զստագոտկային մկանի շրջանի հեղուկ կուտակումը։ Որոշվել է իրականացնել վերջինիս մաշկընթաց դրենավորում՝ ՈՒՁՀ ուղղորդմամբ։
Թարախակույտի ՈՒՁՀ պատկերը
Միջամտությունն իրականացվել է տեղային անզգայացման պայմաններում։ ՈւՁՀ պատկերներով ընտրվել է առավել անվտանգ պունկցիոն ուղին, հատուկ պունկցիոն ասեղով կատարվել է հեղուկ կուտակման նշանակետային պունկցիա, ստացվել է թարախային բնույթի արտադրություն (ստացված պունկտատն ուղարկվել է մանրեաբանական քննության)։
Այնուհետև ՈՒՁՀ ուղղորդմամբ Սելդինգերի մեթոդով կատարվել է թարախակույտի մաշկընթաց դրենավորում։
Հեռացվել է պունկցիոն ասեղի մանդրենը, անցկացվել է ուղղորդող լար, որի վրայով հեռացվել է նաև պունկցիոն ասեղը։ Կատարվել է բուժավորում, որից հետո ուղղորդող լարի վրայով անցկացվել է դրենաժը։ Դրենաժով կատարվել է ասպիրացիա, ստացվել է թարախ։
Դրենաժը ֆիքսվել է մաշկին հանգուցակարերով, միացվել է ամբուլատոր պարկին։
Միջամտությունից 2 ժամ անց հիվանդը դուրս է գրվել կլինիկայից, գանգատներ չի նշել։ Սահմանվել է ամբուլատոր հսկողություն։
2 օր անց դրենաժից այլևս արտադրություն չի դիտվել։ Հիվանդը կրկին զննվել է ինտերվենցիոն ռադիոլոգի կողմից, կատարվել է ՈՒՁՀ քննություն, հեղուկ կուտակում չի վիզուալիզացվել։
Դրենաժը հեռացվել է ամբուլատոր պայմաններում։