Դիմել բժշկի

Վահանաձեվ գեղձի պունկցիոն բիոպսիա. հաճախ տրվող հարցեր

2019-05-01

Մեծ մասամբ, բիոպսիայի վերաբերյալ խոսակցությունները սխալ տեղեկացվածության հետևանք են: Այդ պատճառով կփորձենք անդրադառնալ վահանաձև գեղձի պունկցիոն բիոպսիային վերաբերվող հաճախ հանդիպող հարցերին:

 

Ցավո՞տ է արդյոք վահանաձև գեղձի պունկցիոն բիոպսիան

 

Ցավի զգացողությունը պունկցիոն բիոպսիայի ժամանակ նույնն է, ինչ միջմկանային ներարկման դեպքում: Տարբերությունը միայն տեղակայման մեջ է: Իզուր չէ, որ հետազոտությունը կոչվում է բարակ ասեղային պունկցիոն բիոպսիա: Հետազոտության ընթացքում օգտագործվում են 23-25 Գ չափի ասեղներ, որոնք ավելի բարակ են, քան միջմկանային ներարկման դեպքում կիրառվող ասեղները: Ուստի մտավախությունները մեթոդի ցավոտության հետ կապված անհիմն են:

Բոլոր դեպքերում հիվանդը բժշկի հոգատար ձեռքերում ցավ չպետք է զգա:

 

Ասեղը հետազոտության ընթացքում կարո՞ղ է արդյոք հայտնվել այլ տեղում

 

Որպեսզի ասեղը հայտնվի ճիշտ տեղում`հանգույցի մեջ, բիոպսիան իրականացվում է ՈՒՁՀ հսկողությամբ: Դրանով իսկ բացառվում է ասեղի՝ այլ տեղ հայտնվելը, քանի որ բժիշկը հստակ տեսնում է ասեղի ուղղությունը:

 

Պունկցիոն բիոպսիայի իրականացումը չի՞ բերի արդյոք ուռուցքային պրոցեսի տարածման վահանաձև գեձի սահմաններից դուրս

 

ՈՉ, սա թյուր կարծիք է: Բազմաթիվ հետազոտություններ են կատարվել պունկցիոն բիոպսիային հաջորդած հանգույցի վիրահատական հեռացումից հետո, որոնք ցույց են տվել, որ ուռուցքը գեղձի սահմաններից դուրս չի աճել:

 

Ասում են՝ «Ձեռք մի տուր և խնդիր չես ունենա», հանգույցը չի սկսի աճել ավելի արագ

 

Բարակ ասեղային պունկցիոն բիոպսիան չի հանգեցնում հանգույցի արագ աճի: Եթե մինչ հետազոտությունը հանգույցը աճելու հակում ուներ, այն կաճի նաև բոպսիայից հետո, եթե ոչ`այն չի սկսի աճել պունկցիոն բիոպսիա կատարելու հետևանքով:

 

ինչպե՞ս պատրաստվել բիոպսիային

 

Իրականում նախօրոք պատրաստվելու կարիք չկա: Միակ բանը, որը կարելի է խորհուրդ տալ հիվանդին՝ քազցած չմնալն է: Սա արյան քննություն չէ և սննդի ընդունման հետ որևէ կապ չունի: Բացի այդ, քաղցած մնալը բիոպսիայի ընթացքում գլխապտույտի կամ ընդհանուր թուլության զգացում կարող է առաջացնել, հետևաբար սնունդ ընդունել պետք է:

 

Որք՞ան հաճախ է հարկավոր կրկնել բիոպսիան

 

Բարակ ասեղային պունկցիոն բիոպսիան հետազոտման մեթոդ է, ոչ թե հիվանդի հսկողություն: Եթե բիոպսիայից հետո ստացվել է սպառիչ պաստախան՝ հետազոտությունը կրկնելու անհրաժեշտություն չկա: Պունկցիոն բիոպսիան անհրաժեշտ է կրկնել միայն այն դեպքում, երբ առաջին հետազոտության ժամանակ հայտնաբերվել է բարորակ հանգույց, սակայն հետագայում դիտվել է հանգույցի դինամիկ աճ, կամ կասկածելի ախտանիշներ են առաջացել, օրինակ՝ ձայնի խռպոտություն, տանջող հազ, շնչարգելություն, կլման դժվարացում:

 

Ինձ առաջարկում են վահանաձև գեղձի պունկցիոն բիոպսիա՝ առանց ուլտրաձայնային հսկողության. համաձայնվե՞լ, թե՞ ոչ

 

ՈՉ ՄԻ ԴԵՊՔՈՒՄ: «Կույր բիոպսիան», այսինքն՝ բիոպսիա, որն իրականացվում է ուղղակի շոշափմամբ, արդեն վաղուց պատմություն է դարձել: ՈւՁՀ հսկողությամբ բիոպսիան և առանց դրա հետազոտություննեը, կարելի է ասել, երկու տարբեր հետազոտական մեթոդներ են: ՈւՁՀ հսկողությամբ պունկցիոն բիոպսիայի հավաստիությունը զգալի գերազանցում է «կույր» բիոպսիայի հավաստիությանը:

 

Բիրոպսիայի տվյալները ինֆորմատիվ չեն, արդյոք պետք է կրկնել բիոպսիան

 

Միանշանակ այո: Թե՛ Դուք, թե՛ Ձեր բժիշկը պետք է բարակ ասեղային պունկցիոն բիոպսիայից ստանաք սպառիչ պատասխան: Եթե առաջնային նմուշը բավականաչափ ինֆորմատիվ չէ, ապա պետք է կրկնել հետազոտությունը: Հարկ է նշել, որ ոչ ինֆորմատիվ պունկցիոն բիոպսիան ամենևին էլ չի խոսում Ձեր բժշկի ոչ բարձր մասնագիտական հմտությունների մասին: Կրկնակի բիոպսիան հիմնականում կատարվում է արտահերթ կարգով:

 

Կրկնակի բիոպսիայից հետո պատասխանը կրկին ինֆորմատիվ չէ, ի՞նչ անել

 

Այս պարագայում կարիք կա իրավիճակի առավել ուշադիր գնահատման: Գոյություն ունեն հանգույցներ, որոնցից դժվար է ստանալ պատասխան նույնիսկ կրկնակի հետազոտության դեպքում: Եթե Դուք անվերապահորեն վստակում եք բուժհաստատությանը, որտեղ իրականցվում է հետազոտությունը՝ կրկնեք բիոպսիան ևս մեկ անգամ:

Փորձը ցույց է տալիս, որ ոչ ինֆորմատիվ հանգույցները, հաճախ, բարորակ հանգույցներ են և պետք չէ շտապել վիրահատական եղանակով ազատվել այդ հանգույցներից:

 

 էնդոկրինոլոգ՝ Մարիամ Ավետիսյան

   

 

Ձեր հարցերին պատասխանեց
 Ուիգմոր կլինիկայի էնդոկրինոլոգ Մարիամ Ավետիսյան

 

 

 Ուղարկեք Ձեզ հուզող թեմաները, որոնց մասին կցանկանայիք կարդալ
մեր ֆեյսբուքյան էջին՝ m.me/irgarmenia