Դռներակային գերճնշումը լյարդի քրոնիկ հիվանդության լուրջ բարդություն է, որը դռներակային համակարգում արյան բարձր ճնշումն է: Դռներակային համակարգը տեղափոխում է արյունը ստամքոսից, աղիներից, լեղապարկից և ենթաստամոքսային գեղձից դեպի լյարդ: Դռներակային գերճնշման ամենատարածված պատճառներն են լյարդի ցիռոզը և շրջակա երակներում թրոմբի առկայությունը:
Դռներակային գերճնշման գլխավոր ախտանիշները և բարդություններն են ստամոքս-աղիքային արյունահոսությունը, որովայնի խոռոչում հեղուկի կուտակումը (ասցիտ), ուղեղի ֆունկցիայի խանգարումը (էնցեֆալոպաթիա), ինֆեկցիան և երիկամային անբավարարությունը:
Գոյություն չունի հետազոտության առանձնահատուկ մեթոդ, որը կպարզի դռներակային գերճնշումը, ախտորոշումն իրականացվում է հիմք ընդունելով առկա ախտանիշները՝ ասցիտ և վարիկոզ լայնացած երակներ և այլն: Ախտորոշման համար կիրառվում են նաև գործիքային հետազոտության մեոդներ՝ ուլտրաձայնային հետազոտություն (ՈւՁՀ), ՀՇ (համակարգչային շերտագրում, КТ) և ՄՌՇ (մագինսառեզոնանսային շերտագրում, МРТ), էնդոսկոպիկ հետազոտություն:
Դռներակային գերճնշման և դրա բարդությունների համար գոյություն ունեն բուժական տարբեր մեթոդներ, ներառյալ՝ էնդոսկոպիկ թերապևտիկ միջամտություններ, վիրահատություն և ինտերվենցիոն ռադիոլոգիա (ԻՌ): ԻՌ միջամտություններից է, օրինակ՝ տրանսյուգուլար ներլյարդային պորտոսիստեմիկ շունտավորումը (TIPS), որի ժամանակ ինտերվենցիոն ռադիոլոգը ստենտ է (մետաղյա խողովակ) տեղադրում դռներակի և լյարդային երակի միջև, ինչը թույլ է տալիս բեռնաթափել դռներակային համակարգը` նվազեցնելով արյան գերճնշումը դռներակում:
Միջամտության նպատակն է նվազեցնել արյան ճնշումը վարիկոզ լայնացած երակներում, կանխարգելել լայնացած երակներից արյունահոսությունը և նվազեցնել ասցիտի առաջացման վտանգը:
նյութի աղբյուրը՝ cirse.org
թարգմանությունը՝ irg.am